الكرازة موضوع مش صعب

نفس الخلفية المستخدمة من الدرس الثاني ، الالة في خلفية المسرح
كوتش
اهلا بكم يا اصحابي في اخر اسبوع من اكتشاف الاجابة عن سؤال "ليه انا موجود هنا؟" خلونا ننادي على توني دلوقتي
الاولاد
يا ت ت ت و و و ن ن ن ي
توني
اهلا بيكم يا شباب ، ازيك يا كوتش
كوتش
انت جاهز يا توني عشان تساعدنا في اجابة سؤال "ليه انا موجود هنا؟"
توني
انا عارف انت ليه موجود هنا ، انت موجود عشان انا الاقي حد احكيّ معاه و كمان اهزر
كوتش
يا توني انا باتكلم عن السلسلة اللي بندرسها . الله خلقنا عشان هدف، هو عملنا هنا على الارض عشان نعمل حاجات مهمة
توني
ما انا عارف ... حاجة من الحاجات المهمة اني اهزر معاك
كوتش
يا توني الهزار حاجة تانية ، انت شكلك لازم تراجع الحاجات اللي تعلمناها
توني
انا مستعد
كوتش
ابتدينا لما الآلة طلعت لنا قلوب جوه الصندوق و لزقناهم على واحد من اصحابنا. اتعلمنا اننا موجودين هنا عشان نحب الله من كل القلب و النفس و الفكر و القدرة و ده ممكن نقول عليه ايه؟
توني
العبادة
كوتش
تمام و الاسبوع اللي بعد اتعلمنا ان ربنا عملنا عشان نحتاج لبعض. احنا عيلة الله و ده ممكن نسميه ايه؟
توني
لأ ديه نسيتها ممكن اطلب من واحد من اصحابي يساعدني
كوتش
اتفضل
توني
طيب مين ممكن يساعدني ( اختار واحد من الحاضرين) مظبوط الشركة ده اللي كنت بافكر فيه
كوتش
و الاسبوع اللي بعده اتعلمنا اننا ممكن نكون على شبه المسيح و ده بنسميه ايه؟
توني
ديه بقى اسمها تل تل تل حاجة .. ممكن حد تاني من اصحابي يساعدني
كوتش
ماشي يا توني
توني
اسمها ايه يا شباب ؟ ( اختار اجابة) مظبوط تلمذة
كوتش
و الاسبوع اللي فات اتعلمنا اننا نساعد الناس زي ما سمسم عمل و ديه سمناها ايه؟
توني
دي مساعدة الناس
كوتش
لكن في كلمة تانية تنفع تبتدي بحرف ال "خ"
توني
لأ مش خوخ
كوتش
اكيد مش خوخ
توني
طب ممكن مساعدة كمان من اصحابي (اختر اجابة) الخدمة
كوتش
و الاسبوع ده هانتعلم عن الكرازة
توني
مش ممكن
كوتش
هو ايه اللي مش ممكن
توني
الكرازة مش هي التخبيط على بيوت الناس و زيارتهم و ندخل مع بعض في مناقشة و كلام كتير
كوتش
لأ يا توني مش هي دي الكرازة
توني
مش هي ديه لما تمسك كتابك المقدس القديم و تخبط واحد فوق دماغة لغاية ما يأمن بالمسيح
كوتش
و لا ديه كمان
توني
يبقى اكيد لما تبتدي تزعق في وش واحد لغاية ما يسلم في الاخر و يقبل المسيح
كوتش
لأ بصراحة ، الكرازة هي خبر سار و مفرح
توني
ايه؟
كوتش
ايوه انت بتبلغ خبر مفرح لشخص تاني
توني
يعني ما فيش زعيق او خبط او خناق
كوتش
يا توني الكرازة حاجة ربنا عايزنا كلنا نعملها . لا يمكن يكون معناه الخناق و في الاخر ننرفزهم لأنها ببساطة في مشاركة بخبر سار . عايزني اضرب لك مثال؟
توني
في حاجة ممكن اختار منها؟
كوتش
متهيألي ما فيش قدامنا غير الة التحول ديه ، خلينا نشوف الصندوق السري
نفس المؤثرات الصوتية و الضوئية و المرئية المستخدمة في الاسكتشات السابقة في لحظة ظهور الصندوق



تعريف صديق للرب يسوع صديقك

( بداخل الصندوق هذه المحتويات:
1 ـ كتاب مقدس
2 ـ بطاقات صغيرة
3 ـ نموذج من الاشغال اليدوية التي عملتها احد المجموعات
يوجد هذا النص بداخل الصندوق و يخرجه الكوتش ليقرأه
كوتش
واضح اني في تعليمات النهاردة خلينا نشوف
الكرازة ببساطة معناها نحكي لواحد عن الخبر السار ، الخبر السار اللي ينفع تشارك بيه ان في صديق عظيم اسمه يسوع .
الكرازة انك تعرف صاحبك بصديقك الرب يسوع

( اطلب من ولدين او بنتين يمثلوا ان واحد منهم يقدم المسيح للشخص الاخر) لو انا تخيلت ان المسيح قاعد جنبك او واقف هنا و حبيت اعرف توني بصديقي الرب يسوع

لازم افتكر اني لازم احكي عن الحاجات العجيبة في الرب يسوع صديقي بحيث اقنع صاحبي انه لازم يكون زيه
مثلا احكي عن محبة المسيح ، لطفه و انه شخص ينفع اتكلم معاه عن اي حاجة

(اقرأ من الكتاب المقدس هذا الشاهد يو 1 : 40 ـ 46)
شفت ازاي اندراوس و فيلبس عرفوا اصحابهم للرب يسوع و كل و احد من اصحابهم اتعرفوا على المسيح
نفس الشئ لازم يحصل النهاردة . احنا ممكن نعرف اصحابنا بالرب يسوع و نساعدهم انهم يعرفوه

البطاقة ديه هاتساعدنا قوي هي مبني على الاية الموجودة في يو 3 : 16 " لأنه هكذا احب الله العالم حتى بذل ابنه الوحيد لكي لا يهلك كل من يؤمن به"

خليني اوضح لك ازاي ده يحصل ( استخدم اسم توني و انت رافع البطاقة)
" لأنه هكذا احب الله (توني) حتى بذل ابنه الوحيد لكي لا يهلك (توني) لأن يؤمن به"
ممكن تاخدوا من الكروت ديه يا ولاد عشان تشجعوا اصحابكم انهم يقابلوا صديقك الرب يسوع خليك فاكر اننا موجودين عشان نساعد الناس يتقابلوا مع الرب يسوع
الكرازة موضوع مش صعب

توني
ده الموضوع سهل قوي ، ما افيش ابسط من كده اني اقول لحد عن الرب يسوع
كوتش
مظبوط
توني
تقريبا كأني باعمل معروف في صاحبي
كوتش
لكنها مساعدة لا يمكن تتنسي، كل واحد محتاج يعرف المسيح و اذا كا قولناش عنه ها يعرفه ازاي؟
توني
و الاية بتاعة الكتاب اللي بتساعد سهلة قوي لأنه هكذا احب الله العالم كله حتى بذل ابنه الوحيد
كوتش
مظبوط و كل اللي تعمله بعد كده تحط اسم حد تاني من اصحابك زي ما عملنا من شويه
ايه اللي هانعمله في مجموعتنا الصغيرة النهاردة اننا ندرب ازاي نعمل كده
و هانعمل كمان اشغال يدويه تفكرنا ان الله احب العالم ( اظهر لهم نموذج الاشغال اليدوية)
توني
الكلام ده ممتع قوي
كوتش
هو فعلا كده يا توني و ده يفكرني بحاجة تانية لازم نعملها
توني
ايه هيّ؟
كوتش
احنا بنقضي وقت ممتع جدا في مدارس الاحد ، نقدر ندعي اصحابنا يجوا معانا
توني
بس مش كل صحابي يقدروا يجو ساعات بيتاخروا في النوم يوم اللأحد
كوتش
طب ليه ما تدعيهمش يباتوا عندك من يوم السبت لغاية مدارس الاحد
توني
دي فكرة مدهشة
كوتش
لازم نهتم ندعي اصحابنا يجوا مدارس الاحد ، لأنها حاجة مهمة ممكن تعرفهم بالرب يسوع . الله خلقنا عشان الكرازة ... احنا موجودين هنا عشان نساعد الناس يتعرفوا على الرب يسوع

ها تصلي يا توني
توني
يا رب باشكرك لأنك بتحبنا جدا لدرجة انك ارسلت المسيح لاجلنا و اللي يأمن بالرب يسوع تكون ليه حياة ابدية و ما يهلكش ابدا. ساعدنا اننا نثق في المسيح كصديق عشان نقدر نقدمه لاصحابنا . في اسم الرب يسوع امين

بركه العذراء تكون معك

ميرسي ليك على الموضوع